Sumarfjör á Bókasafni Reykjanesbæjar !

Sumar í Bókasafni Reykjanesbæjar

Í sumar hvetjum við öll til að setja á sig ofurhetjuskikkjuna og taka þátt í Sumarlestri almenningsbókasafnanna. Lestur veitir ofurkraft, því meira sem þú lest, því meira lærir þú og skilur.

Í Bókasafni Reykjanesbæjar færðu sumarlestrarheftið. Það inniheldur 6 lestraráskoranir og skemmtilegt ofurhetjuspil. Í hvert sinn sem áskorun lýkur kvittar foreldri/forráðamaður og lestrarhetjan heimsækir bókasafnið með staðfestinguna til þess að fá límmiða til að líma á spilaborðið. Spilaborðið er mynd af Skarkalabæ. Í Skarkalabæ er allt í rugli! Það þarf að bjarga fólki og furðuverum úr bráðri hættu og það strax! Þú getur verið lestrarhetjan sem bjargar deginum með aðal ofurkraftinum, orðaforðanum! Spilið er samvinnuspil þar sem spilarar hjálpast að við að bjarga fólki og furðuverum í vanda. Spilarar skiptast á að vera hetjan á meðan hinir giska á hverjum/hverju lestrarhetjan ætlar að bjarga á myndinni.

Með hverjum límmiða sjáum við enn betur hvað það er sem er í gangi í Skarkalabæ. Þannig stækkar spilið með hverri lestraráskorun sem lestrarhetjan klárar í sumar.

Sýningarsalur bókasafnsins verður tengdur sumarlestrinum í ár og einkennir liti skólanna sem mun sýna sjónrænt hvernig grunnskólum Reykjanesbæjar gengur í sumarlestrinum. Því hvetjum við öll til að koma í afgreiðslu safnsins eftir hverja bók/límmiða og fá sinn skólalit til þess að hengja upp á sýningunni.

Lesturinn verður hægt að skrá á þátttökuseðil sem hægt verður að skila í Bókasafn Reykjanesbæjar, á heimasíðu safnsins eða í skólabókasafn. Dreginn verður út lestrarvinningur tvisvar í mánuði í allt sumar.

Í lok sumars kemur svo í ljós hvaða skóli las mest og hlýtur peningaverðlaun fyrir bókakaupum í skólabókasafnið.

Sumarlestur er tilvalin samverustund fyrir fjölskyldur, við hvetjum foreldra/forráðamenn til að taka þátt í honum, hjálpa börnum sínum við að velja lestrarefni og hafa gaman að.

Auk sumarlesturs verður boðið upp á ratleik úr sögunni Didda og dauði kötturinn, haldið upp á afmæli Harry Potter og ýmislegt skemmtilegt pop up föndur eða útivera.

Bókasafn Reykjanesbæjar Ævintýri líkast í allt sumar!

Öll börn fá bókasafnskort endurgjaldslaust til 18 ára aldurs gegn ábyrgð foreldris/forráðamanns. Árgjald fullorðinna er 2.500 kr. en ellilífeyrisþegar, atvinnulausir og öryrkjar fá ókeypis bókasafnskort gegn framvísun skírteinis.